كل حالات الإساءة متشابهة!

لو بتتعرضي للإساءة استوعبي النقط دي ضروري!

 كل حالات الإساءة متشابهة!
كل حالات الإساءة متشابهة!

صابرين حسن

الكلام  موجه بصفة خاصة للستات اللي بتدخل علاقات فيها إساءة معاملة (سواء ضرب أو إهانه) .. أنا من خلال خبرتي 7 سنين في ترجمة قضايا العنف المنزلي لمعظم الجنسيات العربية.. كل الحالات تقريبا بتبقي مطابقة.

لو خطيبك أو جوزك بيُسئ معاملتك لازم تستوعبي الآتي:

– مفيش حاجة اسمها آبيوذر (مُسيء – abuser) يتغير، أو بكره ربنا يهديه، والعبط بتاع تقاليدنا ده.. الآبيوذر النهارده شتمك وسامحتيه، بكره هيضربك بالقلم، وبعد كذا مرة؛ هينتهي الأمر بقتلك أثناء التعدي عليك!

– فيه دراسة بتقول أن لو ١٠٠ ست قاعدين في بار، ودخل عليهم 5 رجالة منهم واحد ابيوذر، وفي الـ ١٠٠ ست دول واحدة ضحية سابقة للعنف، الابيوذر دا مش هيكلم ولا واحدة من الـ ١٠٠ ست دول إلا هي! وهي مش هتنجذب إلا له هو بس!
الغلط عندك حضرتك.. الضعف عندك يكفي ويزيد وبيدي إشارات للمعتدي أنك مستباحة.. غيري من نفسك!

– الغرض الأساسي للابيوذر دائماً أنه يعزلك عن العالم عشان متلقيش حد تلجأي له غيره.. لو بتدرسي هيقنعك أنك فاشلة، ولو بتشتغلي هيخليكي تسيبي الشغل، وما يحبش أن يكون ليكي صحبات.. دائماً دائماً هيخليك ندلة معاهم لحد ما الكل يبعد عنك حتي أهلك!

– فيه علامات بتظهر علي الابيوذر في بداية العلاقة.. أياكي أنك تتغاضي عنها وإلا هتشربي المرار.. العصبية الزائدة، وعدم القدرة ف التحكم في أعصابه أثناء الغضب، النرجسية الشديدة، عدم الاعتذار عند الخطأ، التحكم في حياتك بشكل مفرط سواء بالأمر أو بالمادة.

– اعملي لنفسك خطة للخروج من العلاقة بشكل فوري. التأجيل مش في مصلحتك. أهم نقاط الخطة دي أنك متخلفيش منه عيال، ولو حصل يبقي الخطة أساسها أنك تروحي مكان ما يقدرش يوصلك فيه لا انتي ولا العيال. لو أنتي في دولة عربية ده ممكن، لكن لو في دولة غربية الحاجة الوحيدة اللي تقطع علاقة الأب بأطفاله بالقانون لو فيه تحرش جنسي بالاطفال أو ضرب.

– اقطعي علاقتك بكل الناس المشتركين بينكم .. قطع بلا عودة!

– دائماً خلي عندك فلوس علي جنب ما يعرفش حاجة عنها .. هتحتاجيها لما تنوي الخروج .. حاولي تغيري من قدراتك المهنية .. أدرسي من وراه حاجة تخليكي تقدري تشتغلي!

– الابيوذر أكتر حاجة تستفزه المقاومة أو الندية.. خليكي كول جدًا وتجنبي الاحتكاكات معاه خصوصا لو لوحدك من غير أهلك!

– كوني صداقات هو مايعرفش حاجة عنهم.. هينفعوكي لما تخرجي من عندك!

– أياكي والغباء أو حسن النية أو الطيبة أو كلام الطبطبة العقيم بتاع الأهل والأقارب .. حياتك قدام حياته والاختيار بتاعك في النهاية!

– أنتي قوية مهما أقنعك أنك ضعيفة وهو قوي.. الواقع أنه هو الأضعف لأنه بيمارس قوته عليكي.

– انتي إنسان ربنا خلقه حر، ومش من حق أي إنسان آخر أنه يهينك أو يضربك حتى لو بيصرف عليكي وبيأكلك.. الحياة فيها فرص أفضل بس أنتي مش شايفاها!

‫#‏ربنا_معاكي‬ !

عن على فكرة

منصة إعلامية مستقلة

شاهد أيضاً

اكتشاف الجسد (18): العين لا تعشق كل جميل

بطبيعة الحال، تخلل محطات الإعجاب الكبرى التي مررت بها، افتتانات صغيرة، قد تطول وقد تقصر، …

اترك تعليقاً