صورة تعبيرية

أيوه.. أنا مصاب بالاكتئاب

صورة تعبيرية
صورة تعبيرية

أنا أسمي مصطفي سليمان .. وعندي 30 سنة وعندي أعتراف

تم تشخيصي بأني مصاب ب اكتئاب جسيم Major Depression من كام أسبوع ..
وانا حابب أتكلم عن الموضوع دا للانه موضوع حقيقي صعب وخطير بشكل مهدد للحياة بدون أي مبالغة

اولا فيه فرق ما بين الحزن و الاكتئاب
الاكتئاب مرض عضوي حقيقي يصيب الانسان وليس مجرد حالة وبتعدي زي الحزن

اعراض الاكتئاب الجسيم:
طاقتك منعدمة الجسدية والنفسية
احساس بالذنب والخطأ طول الوقت
اضطرابات نوم قوية
فقدان الشهية و الوزن احيانا يكون الأمر معكوس ولكن دون الشعور بالأمر
الرغبة في الموت والانتحار والاحساس بعدم الجدوي ودي مرحلة متقدمة وخطيرة للغاية

بالاضافة ل الاكتئاب الجسيم اللي عندي فيه كمان نوبات فزع panic attack .. قلق Anxiety
ودول جحيم حقيقي ابسط اعراض القلق و نوبات الفزع

قلق Anxiety
التقليل من النفس – الملاحظة الشديدة للتفاصيل – السعي للكمال – مهاجمة الذكريات – نوبة هلع – الخوف من المواجهة سواء كان لعدد كبير او لشخص – اضطرابات المعدة -شد عضلي – خوف غير منطقي – اضطراب في النوم – قلق شديد

نوبات فزع panic attack
خفقان و تسرع القلب – الم في الصدر – صعوبة في التنفس – تعرق – الاحساس بالحرارة أو القشعريرة – رعشة او رجفان – صعوبة في التركيز و التذكر – غثيان أو ألم في المعدة – اسهال – خدران في اليدين

دي الأعراض الخارجية ..اللي انا حابب اتكلم فيه المشاعر المصاحبة للأمر وانا بتكلم هنا علي حالتي انا فقط

الموضوع ليه جوانب كتيره ممكن نتكلم فيها علميا ونظريا ولكن ف الحقيقة ممكن نلخص الأمر بالمشاعر أن الأمر متعلق بالخسارة أو الخوف من الخسارة .. كلها تدور حول الوحدة والفقدان

في عالم مريب زي دلوقتي الموضوع بيبقي جحيم لمن يحاول يتعامل بمشاعره ..جحيم مش بشكل مجازي بشكل حرفي .. انا لغاية اللحظة دي أبويا و أمي ميعرفوش اي شئ عن اللي كاتبه وياريت لو حد يعرفهم ميقولش رجاءا يعني ..

الفترة اللي فاتت ف حياتي اتعرضت لكم من الضغوط العصبية والشخصية أصعب من أني أقدر أتعامل معاها ضغوط مكثفة ف وقت صعب لغاية .. مع الوقت أتحول كل شئ ل جحيم حي عرض لا يتوقف .. ألم صافي تماما غير مبرر ومجاني لولا وجود أبي و أمي كنت أكملت في محاولة أنتحاري في أكتوبر الماضي

آه الأمر بالصعوبة دي بشدة ..

شعور بالانسحاق والهزيمة و التعب و الوحدة و الفقدان و الألم وان محدش فاهم ولا حد مستوعب والكلام لا يخرج من نطاق ..
ان النور ف اخر النفق
ومفيش ليل الا بعده نهار
وان كل شئ بيعدي
وان كل شئ ليه سبب وليه حكمة
وان دا علشان تقوي
وانك هتقدر تعدي
ومفيش حاجة ثابته
والمؤمن مصاب
وان دا اختبار
وهو علشان بيحبك
وهو علشان بيكرهك
وعلشان تقصيرك

ودا اللي مخليني بكتب الكلام دا ، لو انت مش قادر تفهم أو تحس أو تستوعب أو تبذل مجهود أنك تعرف اللي بيحصل متتكلمش فعلا حقيقي مش هزار ولا قلة ذوق !! فعلا أسكت دي نصحية طبية حقيقة

ابتعد عن الوعظ بجد بجد دي كارثة ،سواء الوعظ ديني أو أخلاقي ، ف حالة الاكتئاب دي كارثة حقيقة أنت بتمثل ضغط فوق ما تتخيل علي الانسان دا بتحسسه أنه مخطئ ومذنب ودا شعور كفيل انه يتحول عدة درجاتف الاكتئاب بسرعة شديدة ..
متقولش يا ابني الحياة وامك وابوك ، متقولش الوقت بيعدي اي شئ ، والحياة مش بتقف ع حد الجملة دي لوحدها سبب كافي للأنتحار بالمناسبة !!

انا اتعرضت لنوبة هلع وكنت محظوظ اني أقدر اكتب بعدها ، امبارح كمان اتعرضت لنوبة بشعة لكني مقدرتش أكتب عنها ودا كان شعوري :

” أمس كان شئ حقيقي يجثم علي صدري ، قلبي ، روحي ، أنفاسي
العرق كان يغرقني ، أنفاسي أنسحبت حتي لم أقدر النداء علي المساعدة .. جلست ع الأرض عاجز عن التقاط انفاسي ، شعرت ب كم من القهر
هناك من يقف علي صدري ويتقافز دون اي خوف
أخذت ف نشيج مكتوم ، فصلت الأنترنت كأنه السبب ، ظللت علي الأرض غير قادر ع الحركة اتصبب عرقا
أنفاسي غير منتظمة ولا حتي دقات قلبي
كنت أشعر أن تلك النهاية ..كنت لا أقاوم ..كنت مستسلم وجاهز وفجاءة كل شئ توقف
لم أفهم أي شئ ، مؤخرا لم أعد أفهم أي شئ ولا حتي أحاول الفهم ف اللعنة ع كل تلك الأشياء ”

الموضوع بسيط جدا :

لا تحكم .. بس كدا لا تحكم ..

متقولش انا فاهمك وحاسس بيك ، للانك لا مش فاهمه ولا حاسس بيه
متقولش وانا والله عندي مش عارف ايه .. مفيش حاجة اسمها اللي بيشوف بلاوي الناس بتهون عليه بلوته دا لامعني له ، هو جي ليك علشان يتكلم ويرمي هو محتاج مكان آمن مش قادر أو مش عارف
أسكت الموضوع فعلا خطير

15% من المصابين بالاكتئاب بينتحروا !! الموضوع مش كلمتين حلوين واغنية
الموضوع مركب بشكل مفزع ، واحنا مازالنا بنتعامل مع الموضوع بشكل سلبي وعظي
اعمل بحث بسيط ع الانترنت مش هتلاقي خط ساخن للمساعدة المنتحرين دي كارثة حقيقة كل العالم فيه خط ساخن للغرض دا ، العلاج النفسي باهظ للغاية والبديل لك الله !!

ف يعني ميبقاش الجحيم مزدوج لا انت فاهم ولا عارف تساعد وبتفتي وبتوجع أرجوك أفهم أن فيه فرق رهيب رهيب رهيب ما بين الحزن والاكتئاب ، الاكتئاب مرض عضوي يصيب كيمياء المخ ليه ادوية متخصصة في دا فيه اطباء وتخصص كامل ف دا ، الأمر ليس بالسهولة دي

الموضوع أختيار ؟

واحدة من أكتر الاشياء احباطا ، انك تقول ل حد الكلام دا ، انت اللي عامل كدا ف نفسك ! مش حقيقي ، الاكتئاب مش أختيار ، الاكتئاب مرض عقلي ونفسي حقيقي ، الموضوع ليه جوانب علمية حقيقة
الاكتئاب مش اختيار لا عمره كان ولا عمره هيكون ..

تريد أن المساعدة ؟

استشر طبيب

فقط استمع ، كن هناك ، هو يريد حضن دون أن يطلبه ، لا يريد الاجابة عن اسئلة مالك وفيه ايه واحكي ، يريد يبكي ويصرخ دون حكم دون شعور بالشفقة ،دون كلمتين لا معني لهم عن الأمل والحياة والدين ، وكل هذا الكلام الذي لا طائل منه له ، ان كنت حقا مهتم ستري تلك الاشارات ، ستري ما هي السكة التي يسير بها ، الأمر لا يبدأ فجاءة ولا ينتهي فجاءة ، طريق طويل للغاية ، طريق الوصول لمرحلة القرار او محاولة تنفيذه يسبقه العديد و العديد من الاشارات

شئ أخير :
للأي حد هنا بيقرا الكلام دا ، وهو حاسس بالخوف أو بالعار أو مش قادر يقول ، انت مش غلط ، انت عندك مشكلة ودا مش غلطتك ، أكتب وعبر عن اللي جواك ، ملعونة وجهة نظر الناس ليك ، ملعونة احكامهم ، فكر ف السبب اللي خلاك لسه موجود وكلمه حتي لو مش بشكل مباشر ، اكتب ، اعمل فيديو ، صرح ، أنت مش شئ شخص سئ ، و الأكيد أنت مش لوحدك

أنت شجاع .. أنت بطل أنك لسه موجود ، خليك عارف دا كويس قوي ، احنا كلنا بنعافر ، خلينا نعافر سوا أرجوك .

الاكتئاب ليس حزن .. الاكتئاب ليس عار
الاكتئاب ليس جنون .. الاكتئاب مرض
الاكتئاب جحيم عقلي ..
الاكتئاب يحتاج ل مساعدة حقيقة طبية ..

لو مقتنع يا ريت تشارك وتنشر الكلام دا ..

‫#‏الاكتئاب‬

عن على فكرة

منصة إعلامية مستقلة

4 تعليقات

اترك تعليقاً