أحمد مختار

….

أحمد مختار
أحمد مختار

لا أحبذ كتابة المقالات بالعامية .. ولكن الفصحى ليس بها من التعبيرات ما يوافق مرادي من هذا المقال .. مع الأسف .. حتى اللغة عجزت أمام قذارتنا

 

مش هنعمل حاجة .. ومش هنتحرك من مكاننا .. لأن ببساطة ماحدش همه ان بلده تتحرك .. وحتى ماحدش همه ان فريقه يكون صح … كل اللى همه إن الفريق التاني يكون غلط وبس ….

كل واحد قاعد طول اليوم على فيس بوك وتويتر ومواقع الأخبار بيدور على خبر .. أو نص خبر .. أو ربع خبر .. أو كلمة واحدة تثبت ان التاني حمار ..

كل واحد فينا بيصدق المصدر لو قال اللى على مزاجه .. ولو نفس المصدر قال حاجة مش على مزاجه يبقى مصدر كداب .. حتى لو الحاجتين جوة نفس الخبر

مش هنبقى حاجة .. لأننا عايزين نبقى ولا حاجة .. عشان نثبت ان التاني حمار ..

هجوم من أجل الهجوم … أي كلام بيتقال …..

طيارة وقعت فى شرم الشيخ … قال لك اوعى … مصر هي الأخيرة فى مستوى الأمان فى المطارات .. طب ماهو تاني يوم طيارة وقعت فى جنوب السودان … وبعدها بيوم طيارة اتحرقت فى فرنسا … طب فين الأمن والامان وطيارات بتتخطف فى امريكا فى سبتمبر ؟؟ طب فين الأمن والامان فى تفجيرات فرنسا ؟؟؟ ليه فى كل المصايب اللى فى كل حتة فى العالم بنتعاطف مع الضحية واي مصيبة تحصل فى مصر بنهاجم وبس ؟؟؟

قال لك مؤتمر الدول العشرين فى تركيا .. شفت أردوغان كان بيتعامل ازاي مع بوتن ؟؟؟ كان اثبات حقيقي لقوة تركيا .. الله .. طب هو انت ماسمعتش كلمة بوتن لما قالها صراحة ان فيه دول من الموجودة هنا بتمول داعش ؟؟؟ هي دي مش قصف جبهة لأوردوغان تحديدا ؟؟

قال لك مصر هتعمل مفاعل نووي .. وهات يا تريقة .. وهات يا كوميكس … وهات يا سخرية … طب يا عم قول اقتراح .. قول حاجة مفيدة .. ماهو لو فضلنا كدة كل حاجة نحب نعملها هتتريقوا هنفضل مكاننا .. اذكر فيما اذكر ان ايام مبارك طلعت هوجة الكلام على مفاعل نووي .. وليه مصر مفيهاش نشاط نووي ؟؟ ونفس الناس اللى بيتريقوا دلوقتى على محاولات عمل مفاعل نووي هم نفس الناس اللى اتريقوا ايام مبارك على عدم وجود مفاعل نووي

لما المصريين اتقتلوا فى ليبيا .. طلعت الطيارات المصرية ضربت بعض قواعد لداعش فى ليبيا .. الاخوة المتفذلكين قالوا داعش ضحكت على مصر وجرجرتها للحرب غصب عنها .. السياسيين المصرين طلعوا اغبيا واتضحك عليهم

لما فرنسا ضربت داعش سوريا بعد تفجيرات فرنسا طلع نفس الأخوة المتفذلكين بيقولوا يا سلاااااااام .. رئيس فرنسا طلع راجل وانتقم للفرنسيين اللى اتقتلوا هناك .. وهم هم نفس الناس اللى هللوا للإجراءات الاستثنائية اللى عملها رئيس فرنسا واللى بتقيد كل الحريات عشان خاطر حادثة واحدة وضد أي إجراء استثنائي يتعمل فى مصر مع كل الحوادث اللى فيها

هم هم نفس الناس اللى كانوا ساكتين أيام مرسي على قطع الكهرباء طول الوقت بالعشر ساعات كل يوم ودلوقتى بيأفأفوا لما الكهرباء تقطع نص ساعة .. هم هم

وزيهم بالظبط العكس …. لما طلع محمد ابراهيم وزير الداخلية السابق كشاهد فى قضايا الإخوان وقال صراحة إن الإخوان لم يحاولوا التدخل فى الملف الأمني فى وزارة الداخلية .. طلعوا بعض أصدقائنا قال لك طبعا لازم يقول كدة ماهو إخوان .. محمد إبراهيم إخوان .. آه والنعمة .. وهم هم نفس الناس اللى قالوا عليه راجل لا يخاف فى الله لومة لائم لما قال ان مرسي أمر بفض أي تجمع بالقوة .. هم هم نفس الناس …

وهم هم اللى لعنوا سنسفيل باسم عودة لما اقترح منظومة الخبز الجديدة … ولما اتطبقت هي هي بحذافيرها بعد رحيل الإخوان هم هم نفس الناس هللوا لها واعتبروها أحسن منظومة خبز فى التاريخ

الناس اللى اتحملوا كل كلام مرسي عديم المعنى هم اللى اتريقوا على أي غلطة نحوية للسيسي … والناس اللى اتحملوا ارتفاع سعر الدولار ل8 جنيه فى عهد السيسي هم هم نفس الناس اللى ملوا الدنيا عويل لما الدولار قرب من 7 جنيه فى عهد مرسي

 

الموضوع برمته اتحول لشماتة .. شماتة المعارض فى المؤيد … بقينا بنشمت فى بلدنا مع كل خبر وحش … بنشمت فعليا .. تخيلوا واحد شمتان ان بلده حصل فيها مصيبة .. واحد شمتان ان روسيا وبريطانيا قرروا ترحيل السياح .. شمتان ان التحقيقات أثبتت ان الطيارة عليها قنبلة .. تخيلوا ان ناس شمتانة فى بلدها ؟؟؟؟؟؟

 

كل الناس إلا من رحم ربي بيشوفوا بعين واحدة …. وصلنا إن كل واحد عايز الدنيا تبقى أسوأ عشان يثبت إن التاني حمار …. شعب بالكيفية دي … وبالتفكير دة … حرام أصلا يتقدم أو يبقى حاجة كويسة …. دة ضد طبيعة الكون أصلا

 

واحد هيسأل …. فين عنوان المقال ؟؟

 

المقال دة مالقيتلوش غير عنوان واحد بس .. لكن مع الأسف طلع عنوان أبيح … وهو أساسا مش مقال .. هي مجرد فضفضة بدال ما أطق .. بس كدة

عن ّأحمد مختار

ّأحمد مختار
شاعر

شاهد أيضاً

نتيجة مباراة الأهلي المصري والنجم الساحلي التونسي

حقق النجم الساحلي التونسي فوزًا على منافسه الأهلي المصري في مباراة الذهاب للدور قبل النهائي …

اترك تعليقاً