عيشها بكل ثقة

self esteem

*لازم تعرف إن الثقة بالنفس أساس النجاح. لو عندك مهارات وشهادات علمية كبيرة جدًا بس الثقة عندك ضعيفة أو مش بالقدر الكافي فإعرف إنك مش هتنجح في حياتك بالقدر الكافي!

*خليني أقولك إن الثقة بالنفس مهمة في كل جوانب حياتك، في بيتك وانت بتتعامل مع أسرتك، وانت في شغلك وانت بتتعامل مع مديرك، أكيد لازم تكون واثق من نفسك في المواقف دي خاصة كمان لو عندك مقابلة عمل ورايح تتقدم لوظيفة. في مدرستك، في جامعتك، لو كنت طالب وبتدرس في معاملتك مع اصحابك انت محتاج الثقة جدًا في حياتك.

*قبل ما نبدا في كلامنا عن أسباب ضعف الثقة بالنفس وطرق علاجها، خليني أقولك معلومات مهمه جدًا لازم تعرفها في البداية:

1- إن الثقة بالنفس موقفية: بمعنى إنك ممكن يكون عندك ضعف في الثقة في موقف معين، ده مش معناه خالص إنك مش واثق في نفسك، علي سبيل المثال، ممكن تحس إنك مش واثق في نفسك أوي وانت بتتكلم قدام الجمهور مثلاً.
2- الثقة بالنفس مكتسبة: يعني تقدر تكتسبها زي أي مهارة، زي مثلاً مهارة الاقناع والتأثير في الآخرين، كل دي مهارات انت تقدر تعلمها.
3- الثقة بالنفس موجودة عند كل الناس بس بنسب مختلفة، يعني انت عندك نسبه ثقة ولازم تنمِّيها.

*من أسباب ضعف الثقة بالنفس:

1- كلامك السلبي عن نفسك: بمعنى إنك بتتكلم عن نفسك بطريقة سلبية جدًا، زي مثلاً ما بتقول لنفسك: “أنا مش هقدر – أنا ضعيف – هم أفضل مني أكيد”.
وهقولك نقطة مهمة جدًا (إن عقلك الباطن مش بيفهم كلامك، هو بيطبقه حرفيًا بدون تفسير) قوله أنا ضعيف هتلاقيه بيمدك بكل مشاعر الضعف والانهزام.
2- مقارنة نفسك بالآخرين بهدف التقليل من نفسك: يعني انت بتقدر نفسك بأشخاص – ممكن يكونوا أعلي منك فعلاً، لكن انت هدفك من المقارنة دي إنك تثبت لنفسك إنك أقل منهم فعلا .
3- الخوف من حكم الآخرين عليك: تخاف إنهم “هيقولوا” عليك إنك كذا لو عملت تصرف معين وده طبعًا هيخليك تعمل إي تصرف -وانت حاسس إنك متراقب وخايف منهم.
4- التربية الخاطئة من الأسرة: إن الأسرة بتربي الطفل من البداية إن يكون تابع ليهم ومعندوش فرصة إنه يعبر عن رأيه و ده بيأثر سلبي عليه لِما بعد كده.

**حلول لتقوية الثقة بالنفس:

1- تقبل نفسك: إقبل نفسك زي ما انت. تقبل شكلك، وصوتك، واسلوبك.
2- قدَّر نفسك وحبها وسامحها.
3- ركِّز دايمًا على نقاط القوة اللي عندك.
4- توقَّف عن اللوم الشديد لنفسك.
5- توقف عن الحديث السلبي عن نفسك.
واستبدله بعبارات إيجابية، قول لنفسك دايمًا (أنا قوي – أنا قدها – أنا أقدر)
6- اربط ثقتك بنفسك دايمًا بربك، وخليك واثق إن ربنا معاك دايمًا وردد دايمًا (إني معي ربي سيهديني)

وافتكر دايمًا (إن بالثقة بالنفس يأتي النجاح وليس العكس)

عن إسلام أشرف

إسلام أشرف
مدرب تنمية بشرية طالب بقسم علم نفس كليه تربية كاتب في مجال التنمية البشرية

شاهد أيضاً

كيف تتخلص من الأخطاء العشرة فى القراءة ؟

القراءة هي غذاء الروح، هذه هي المقولة التي نعرفها منذ زمن ولكن لن يعرف قيمتها …

اترك تعليقاً