بعض مما علمتنى 2016 ؟!

ليه هى “بعض” مما علمتنى  مش “كل” ؟! لأن زى ما بيقولوا ليس كل ما يعرف يقال، ولا كل ما يقال حان وقته، ولا كل ماحان وقة حضر أهله.. وبما ان القاعدة الأصولية بتقول “ما لا يدرك كله، لا يترك جله”، فأنا هقول بعض اللى علمتهولى الأيام، مش حكم بقدر ما هى دروس، ودروس الزمن أظن انها ما بتتنسيش بسهوله، لأن الزمن معلم ماهر جداً له فنونه وأساليبه، ولا ييأس أبداً !

علمتنى 2016 إنك لازم تراجع نفسك دايما، وتعدل المسار على طول، كلنا فى رحلة الحياة لسه بنتعلم السواقة.. قليل قوى همه المحترفين فيها، بس راعى وخليك مصحصح بالقدر الكافى انك خلال الرحلة ما تخيش فى الأشخاص والأماكن الغلط.. لأن الخبطه أبداً مش هتترد على البارد !

– إذا وقعت قوم، وإذا قمت سامح، وما تندمش على حاجه لأن الندم كائن مشوه عامل بالظبط زى “سميغل” فى فيلم مملكة الخواتم، مش هيهدأ غير لما يوقعك، مره بعد مره، ولما يوقعك جنود الظلام مش هيرحموك !

– عمرك ما تمسك فى إيد حد هو مش ماسك فى إيدك أو حتى متردد يسمك فيها بقوه.

– اللى بيبع بتبقى أكبر الأشياء عنده هينة، مالهاش قيمة.. فلما يعمل كده “يبيعك”، ما تحاولش حتى تبص وراك، لأنك سعتها بتبقى بتهين نفسك وكل اللى معاك !

– الحب هو أجمل شئ فى الوجود، خلق اللى به البشر، وجعل له قانون فى الأرض، فأحفظ قلبك من انك تودعه فى إيد حد ما يقدرش.

– ما فيش حد كامل رب البشر قال ” كل ابن آدم خطاء، وخير الخطائين التوابين” عشان كده ابعد عن الناس اللى ما بيعزروش الخلق.

– رأس كل أمر حفظ الأسرار، وسنامه الوفاء بالوعود، عشان كده ما تتهاونش مع فشائين الأسرار أكلين وعودهم.

– لو غلطان اعتذر ” لأن الإعتذار فضيله ما يعرفهاش غير القليل، سيدنا موسى قال للخضر معتذراً ” لاتؤاخذنى بما نسيت” لكن أتبعها ” ولا ترهقنى من أمرى عسرا” لأن اللى فاهم قيمة الإعتذار عمره ما هيرهقك أبداً.. المهم انك ما ترهقهوش انه قبل إعتذارك مره قبل كده!

– حب.. حب.. حب، حب بجد وافتح قلبك، حب البشر، حب أهلك، حب حيوانات الشارع، حب طبيخ امك -حتى لو كان وحش-، حب عيون حبيبتك، حب ضحكت طفل صغير فى المترو ما تعرفوش، حب رضا ست عجوزه “كركوبه” قاعده فى عز البرد تبيع بطاطا على الرصيف، حتى اللى شتمك وأكل على سيرتك وشرب، حبه لأنه ده أكتر واحد غلبان حتى لو فاكر نفسه ناصح، وأخيراً حب نفسك.. وامشى أضحك للخلق !

– خلال رحلتك فى الحياة فى إختبارات.. إختبار بيبعدك، وإختبار بيقربك، وإختبار تانى بيعلمك حاجه لو عشت عمر فوق عمرك مش هتتعلمها، ولا أحكم حكماء الأرض هيعلمهالك، لأن اللى بيعلمهالك هنا هو أحكم الحاكمين، ربك.. فخليك ممتن لإختباراتك وحاول ما تفقدش فيها درجات كتير، لأن هنا فعلا الدرجة بتفرق !
– أنسب تشبيه إكتشفته عن علاقة البشر ببعضهم هو المثل اللى بيقول “كل إناء ينضح بما فيه”، عمرك ما سألت نفسك اشمعنى شبهوا البنى أدمين بالأنيه اللى بيبان اللى جواها كل اما تقرب منها وتحتك بيها؟!.. لأن البنى أدمين فعلا زى الميه.. فيه ميه ملوثه، وفيه ميه مسكره، وفيه ميه ملحه، وفيه ميه لا ليها لا طعم ولا لون، البشر على إختلافهم، وكل واحد على عيبه، لكن أسواء أنواع البشر اللى عاملين زى السراب، من بعيد تلاقى ميه، لكن كل أما تقرب منهم ما بتلاقيش غير أحد أشكال الوهم البصري.. سراب!

2016
أنا ممنون..
ممنون يا هانم والنبى ممنون
وحتى لو كان امتنانى جنون
بتضحكينى وتوريهالى جناين
ما كأنهاش يا ست هانم… سجون
ممنون !

عن أحمد النَميس

أحمد النَميس
صحفي، مذيع راديو، باحث فى الشؤون الأفريقية. أعشق التراث الشعبى المصري والمصريين.

شاهد أيضاً

سارة حمدي تكتب: أبيض وألوان وأسود

كان المدخل مفتوحًا ويسهل لأي شخص الدخول. وقفت أمام الباب وفتحته ثم دخلت. وجدت أناسًا …

اترك تعليقاً