الرئيسية / رأي / بدائل.. يمكن تخلق انسان!

بدائل.. يمكن تخلق انسان!

إسراء يوسف

بدل ما تعاقبهم لو سألوك “ربنا مين؟ وجه منين؟” علمهم سر وجودهم فى الحياة والهدف من خلق البشرية: تعمير الارض خيرا والبحث عن الله فى خلقه.
بدل ما تخوفهم عذاب القبر وعذاب تارك الصلاة وتربى جواهم الخوف من الله: علمهم يغمضوا عنيهم يقولوا “يا رب” فهو موجود للرحمة بهم.
بدل ما تهديهم عصفور فى قفص.. علمهم يحطوا شوية رز على طرف شباكهم، وأن العصفور ممكن يجي باختياره الحرية.
بدل ما تخوفهم من الكلب فى الصغر لإجبارهم على حاجة “وإلا يعضهم”.. علمه وفاء الكلب، هايكبر يلاقيه أوفى من كائنات بشرية.
بدل ما تعلم الولد يكون راجل من صغره.. علمه يكون طفل ويعيش كل لحظة بعمرها.
علم بنتك انها مش عورة صوتك مش عورة.. قول لها “جسمك مش عورة….اتحركى، وجودك مش عورة.. تحررى”
بدل ما تعلم البنت تحمى نفسها من الاغتصاب.. علم الولد انه مايغتصبش.
بدل ما تفرض على بنتك شكل لبس محدد عشان محدش يعاكسها.. علم الولد أنه مهما شاف مالوش دعوة.
بدل ما تكرههم فى كل من اختلف عنهم جنس ودين.. علمهم أن كلنا انسان آخرنا عظام بيضاء تحت التراب.
بدل ما تكذب عليهم وتقولهم أن الحب حرام.. علمهم ازاى يختاروا الحب اللى يناسبهم
بدل ما تكذب عليهم بأن الموسيقى حرام.. علمهم يسمعوا عزف الطبيعة
بدل ما تنم قدامهم على خلق الله وشكلهم وعيوبهم.. علمهم يصلحوا من عيوبهم الشخصية.
بدل ما تعاقبهم لو مطلعوش الاول فى المدرسة.. علمهم ازاى يكون متميز فى قدراته.
بدل ما تعاقبهم على كذبهم عليك فى كبر سنهم.. علم نفسك ماتكذبش عليهم فى صغر سنهم بوعود الفسح والهدايا.
بدل ماتخوفهم طول حياتهم للحفاظ على عذرية جسمهم.. علمهم يحافظوا على عذرية عقلهم.
بدل ماتفرض عليهم العادات والتقاليد.. علمهم يقرأوا كتاب ويتعلموا منه الحياة.
من الاخر.. بدل ما تحطهم فى قالب مليء بمساوئك.. علمهم يعيشوا.. حياة لا يبحثوا فيها عن ما يحلل الانتحار.

عن إسراء يوسف

إسراء يوسف
فنانة تشكيلية

شاهد أيضاً

إلى كمال.. وشجر الياسمين المُزهِر حول بيته

مرت فترة المراهقة والعشرينييات من عمري بسلاسة تامة، مع تهميش حياتي العاطفية أيًا كان من …

اترك تعليقاً