الرئيسية / رأي / احفظ القايمة دي.. تنفع كل دفعة تجنيد!

احفظ القايمة دي.. تنفع كل دفعة تجنيد!

تجنيد

بخصوص الرجالة إلى داخلين على جيش دفعتي السنوية، أولادي في العسكرية، الدفعة إلى بتدخل في الشتاء وتخرج في الشتاء دفعة 1/3/2016

في حجات هقولهالك تعملها وتمشي عليها بالحرف.

1- أولاً يوم الأرجاء مش مطلوب انك تروح بدري علشان هتقعد كتير مش هتعمل فيهم حاجة وهتتخنق من الزحمة، الهدف انك تفضي الكنتين يوم الأرجاء بتاعي العقيد طلع المنصة الساعة 2 الظهر وفي كانت جاية من 6. الصبح

2- بردوا يوم الأرجاء متاخدش معاك موبايل خالص، علشان وانت خارج هتقف طابور بالمئات علشان تاخدة

3- لو جالك في الترشيح ظابط متقلقش طول مانت مش طبيب ومش مهندس دول بيتخطفوا

4- خلي بالك أن يوم سماع السلاح هتترحل بعدها بيوم واحد في الأغلب فجهز نفسك وربنا يبعدك عن حرف الميم، ومتبصش لحد في سلاحة grin emoticon كلة جيش.

5- يوم الترحيل ودا الأهم هتروح الهايكستب خلي بالك انه هيكون أصعب واسود يوم هتقضية في حياتك لأنك هتتهلك اليوم كلة وهتقلع الملكي وتلبس الميري. فخليك رويح رويح ها، ولو انت حساس اوي متعيطش غير لحظة ما تكون على نمرتك في عنبرك

6- أحفظ نمرتك متنسيهاش علشان انت من اليوم دا هتتحول لرقم

7- في نصيحة بتقولك متصاحبش في مركز التدريب علشان هتفترقوا بعض، بس هقولك أحلى صحبة هتبقى في مركز التدريب، خاف على أصحابك والعساكر إلى زيك ملكمش غير بعض وداروا على بعض، واوعي تبيعوا بعض

8- صف الظابط في مركز التدريب هو أبوك، الفترة دي كلها طوابير، بس أهم طابورين تحضرهم جمع القائد الصبح لأن بيتاخد فيه تمام الساعة 6، وطابور بليل قبل النوم علشان التمام بردوا، باقي الطوابير ممكن تزوغ منها بس لو اتقفشت مليش دعوه

ركز بقا في الكلام دا…

– خلي بالك أن هناك مش هتكون الماية متوفرة بشكل دايم ومتسالش ليه..؟

– مشاكلك هناك هتتلخص في البدائيات، الحمام والأكل والشرب والنظافة والنوم، بالنسبة للحمام فالحمام بلدي ولامؤاخذة هتتشطف بازازتك وبالنسبة لكيفية كدا هتتعلمة لوحدك متقلقش، ومعلومة ليك انا اول مرة دخلت فيها حمام كان بعد 8 أيام

– ودا بسبب الأكل، هناك الأكل فول ومربة في الفطار والعشا وفي الغدا رز أو مكرونة وطبيخ ونسايل لحمة، عامة الأكل ميتاكلش بس ملكش غيرة وهتتاقلم عليه

– خد معاك ازايز ماية كبيرة، هناك مفيش الازايز الكبيرة كلة صغير وغالي، كمان الازايز الكبيرة هتحتاجها تخزن فيها ماية وهتحتاج منهم واحدة للحمام واكتب عليها حرف آل ح ولو حد جيه قالك دي بتاعة ايه قولة بتاعة حبايبي

– خد موبايل نوكيا صغير كدا عرفت تدخلة من الأمن تمام معرفتش سيبة على البوابة، وهتاخدة وانت نازل إجازة، خد خط سجل عليه كل الأرقام المهمة زي أهلك حبيبتك واسطتك :-D، ويفضل لو تكتبهم في ورقة كمان

– الواسطة ملهاش لازمة ومش هتعملك حاجة في مركز التدريب، لو حد هيخدمك وانت مترحل من مركز التدريب لو هيعمل لك إلحاق أو في الكتيبة يريحك

– وانت ماشي خد معاك الآتي
مكن حلاقة بلاستيك أو جيلات 3 شفرات، متاخدش باور فيوجن وخمس وست شفرات علشان الحجات دي عاوزة ماية كتير ومش هتنفعك هناك

– خد فوم حلاقة متاخدش معجون، ولو دقنك بتلتهب روح الصيدلية في ازازة ماية كبريتية رشها بعد الحلاقة

– خد وايبس ديتول علشان في أيام مش هتعرف تاخد دش فيها فهتضطر تنظف جسمك بيه، وخد صابون ديتول كمان علشان لما ربنا يفرجها وتستحمي وهناك الدش بازازة بردوا

– خد ملابس داخلية قطن علشان متلزقش :-D، وطبعاً دفعة شهر واحد لازم ياخدوا كلاسين حتى لو مبتلبسهاش أو بتستعيبها خدها علشان البرد جامد السنة دي

– خد قفلين كمبيوتر واحد للمخلة وواحد لدولابك، اشترى تأفيزة بيج، وخد شارابات علشان الشراب الميري هيقطع رجلك علشان صوف، ملوش لازمة هدوم كتير وفر مساحة كفاية ترنج واحد لأنك هتستلم ترنج هناك

– كل ما تلاقي فرصة للنوم نام كتير جيشك يطير، مش مطلوب ابدا تقول أنا بعرف أو انا بفهم علشان متسحلش نفسك في حوارات ومتدايقش من كلمة مستجد أو لو حد استظرف وقالك مستشخ

– متبداش تعد السنة بتاعتك غير يوم 1-3 لأن بعدها اليوم إلى بيعدي مبيرجعش

– متصدقش أن في إجازة غير لما تكون في بيتك، حتى لو لبست ملكي وركبت الأتوبيس ممكن الإجازة تتلغي وحصلت معايا نزلنا من الاتوبيسات تاني

وأخيراً هي فترة وهتعدي وبكرة تضحك عليها، اكيد هتتعلم منها حجات إنسانية كتير وهتتعرف على اشكال واصناف الناس وهتخليلك في كل بلد صاحب، وانجزوا علشان عاوز أطلع.

عن أحمد شعراني

أحمد شعراني
مدير تحرير مجلة فورورد سابقًا
تعليقات